Prizren, 1 nëntor - Kryeministri i Republikës së Kosovës, Hashim Thaçi përuroi dy rrugë të reja në qytetin e Prizrenit. I shoqëruar nga Ministri i Infrastrukturës, Fehmi Mujota, dhe kryetari i komunës së Prizrenit, Ramadan Muja, kryeministri preu shiritin fillimisht në rrugën "Tahir Sinani” në dalje të Prizrenit në drejtim të Vërmicës, e më pas edhe në rrugën që lidh Prizrenin me fshatin Hoçë e Qytetit.
Me këtë rast, kryeministri Hashim Thaçi tha se Prizreni po merr pamjen e një qyteti shumë modern, që po bëhet shembull edhe për qytetet tjera të Republikës së Kosovës.
"Qyteti i Prizrenit po ndryshon për të mirë, po ndryshon për të mirë jeta e qytetarëve të Prizrenit. Do të rritet mirëqenia sociale si dhe do të krijohen vende të reja të punës” tha kryeministri.
Ky qytet, theksoi kryeministri Thaçi, e ka fatin që e ka afër autostradën, 38 kilometrat e para të së cilës pritet të përurohen pas dhjetë ditëve.
Pos këtyre, kryeministri Thaçi bëri të ditur se për impiantin e përpunimit të ujërave të zeza për qytetin e Prizrenit do të ndahen mbi 22 milionë euro, dhe se Prizreni do të jetë qyteti i parë me një projekt të tillë.
Kryetari i Komunës së Prizrenit, Ramadan Muja, vlerësoi se këto rrugë të reja do të ndihmojnë qytetin të shkarkohet nga numri i madh i veturave.
