Në takimin e kryeministrit të Republikës së Kosovës, Hashim Thaçi me raportuesen e Parlamentit Evropian për Kosovën, Ulrike Lunacek, kjo e fundit informoi se në Parlamentin Evropian më 22 nëntor do të debatohet Raporti i këtij institucioni të BE-së mbi zhvillimet në Kosovë.

Në këtë takim, sipas njoftimit të Kryeministrisë është diskutuar për proceset e rëndësishme, nëpër të cilat është duke kaluar Kosova, si në kontekstin e brendshëm, ashtu edhe ne rrafshin e integrimit evropian.

Thaçi ka falënderuar eurodeputeten për kontributin e saj dhe të anëtarëve të Parlamentit Evropian lidhur me mbrojtjen e interesave të Kosovës në Bruksel dhe e siguroi atë se Kosova do të bëjë përparim të dukshëm në rrugën e integrimit.

Kreu i ekzekutivit theksoi se bazuar në përkushtimin institucional të Kosovës për përmbushjen e plotë të kritereve dhe standardeve evropiane të integrimit, liberalizimi i vizave për qytetarët e Kosovës do të ndodhë shumë shpejt.

Ai ka konfirmuar që Republika e Kosovës ka qenë dhe do të mbetet faktor konstruktiv, duke respektuar vlerën e dialogut dhe të bashkëpunimit.

Ndërkaq, raportuesja e Parlamentit Evropian për Kosovën, Ulrike Lunacek ka shprehur optimizmin se qytetarët e Kosovës në një periudhë të afërt do të gëzojnë lirinë e lëvizjes në vendet e Bashkimit Evropian.

Lunacek ka vlerësuar lartë rolin konstruktiv të Republikës së Kosovës në dialogun teknik mes Republikës së Kosovës dhe Republikës së Serbisë, duke konfirmuar mbështetjen e fuqishme nga ana e anëtarëve të Parlamentit Evropian për Kosovën në rrugën e saj drejt integrimit.