Main » 2011»October»28 » Kreu i Prishtinës kërkon ndihmë nga Komisioni Evropian
11:04 PM
Kreu i Prishtinës kërkon ndihmë nga Komisioni Evropian
Prishtinë, 28 tetor - Kryetari i Komunës së Prishtinës, Isa Mustafa, dhe zv/kryetari Avdullah Hoti, kanë pritur të premten në një takim njoftues drejtorin e ri të Operacioneve në Zyrën Ndërlidhëse të Komisionit Evropian në Prishtinë, Christof Stock.
Mustafa dhe Stock biseduan për intensifikimin e bashkëpunimit në shumë fusha që kanë të bëjnë më realizimin e projekteve që financohen nga Komisioni Evropian, për legjislacionin e qeverisjes së komunave, kompanitë publike etj. Kreu i Prishtinës kërkoi mbështetje nga zyrtari i KE-së edhe për fushën e planifikimit, transportit urban, trajtimit të ujërave të zeza dhe të mbeturinave.
"Ne kemi nevojë për mbështetjen tuaj dhe të ekspertëve të BE-së për të na ofruar ekspertizë dhe ndihmë në fushën e përmirësimit të legjislacionit lidhur me qeverisjen dhe kompetencat e komunave, pastaj në fushën e planifikimit urban, transportit urban, trajtimit të ujërave të zeza e të mbeturinave, marrjen e përgjegjësive për kompanitë publike që aktualisht menaxhohen nga niveli qendror etj., çështje që kanë të bëjnë me ofrimin e shërbimeve për qytetarë dhe arritjen e standardeve të BE-së”, tha Isa Mustafa.
Christof Stock tha se Zyra Ndërlidhëse e KE-së është e gatshme që bashkërisht me përgjegjësit e Komunës së Prishtinës të angazhojë ekspertë të fushave përkatëse dhe për realizimin e projekteve të planifikuara e të financuara nga KE-ja përmes programit IPA.
