Main » 2011»October»30 » CDF ndihmon sanimin e kulmit të Pallatit të Kulturës në Deçan
4:23 PM
CDF ndihmon sanimin e kulmit të Pallatit të Kulturës në Deçan
Deçan, 28 tetor - Ka filluar të rinovohet kulmi i pallatit të kulturës "Jusuf Gërvalla” në Deçan, bashkëfinancim i Fondit për Zhvillim Komunitar (CDF), përmes Bankës Botërore dhe Kuvendit Komunal të Deçanit.
Drejtoresha e kësaj organizate për Kosovë, Nermin Mahmuti theksoi se edhe në të ardhmen do të ketë bashkëpunim dhe ndihmesë nga ana e CDF-së për komunën e Deçanit. "Ne kemi qenë prezent në këtë komunë edhe vite të tjera dhe ky projekt në infrastrukturë është i shtati”, theksoi Mahmuti, duke shtuar se nga ana e CDF-së në këtë komunë janë duke u përkrahur edhe bizneset e vogla si dhe mikrobizneset. Mahmuti theksoi se punimet rreth mbarëvajtjes në këtë projekt do t’i mbikëqyrin inxhinierët e CDF-së, në bashkëpunim me ata komunalë.
Kryetari i Deçanit, Rasim Selmanaj tha se pas një pauze të gjatë rikthehen raportet në mes të kësaj komune dhe CDF-së, kësaj radhe për punimin e çatisë së pallatit të kulturës "Jusuf Gërvalla”.
"Komuna është falënderuese dhe unë besoj shumë se ky bashkëpunim dhe këto investime të përbashkëta do të vazhdojnë edhe në të ardhmen”, tha Selmanaj.
Një investim të tillë e mirëpret edhe drejtori i këtij pallati, Ali Geci, i cili theksoi se gjendja e pallatit është shumë e rëndë, ngase pas çdo reshje atmosferike në shumë vende pikon dhe lagështia e dëmton atë në masë të madhe.
Vlera totale e këtij projekti është 113 mijë euro, nga të cilat me 68 mijë do të participojë CDF-ja, ndërsa me 55 mijë Komuna e Deçanit.
