 Ratomir Bozovic nga Kosova, i cili dyshohet për vrasjen në Bërnjak të pjesëtarit të Njësisë Speciale të Policisë së Kosovës, Enver Zymber, "mohoi të ketë pasur gisht në vrasjen e tij, por që për hir të familjes, i është dashur të strehohet"."Nuk kam asnjë lidhje me vdekjen e Zymberit, por më duhet të strehohem për faktin se unë dhe familja ime jemi në shënjestër. Ka filluar sërish sezoni i gjuetisë mbi serbët, kurse unë duhet te jem një prej trofeve”, citohet të ketë thënë Bozovic për të përditshmen serbe "Vecernje Novosti”, transmeton Rel. Me kërkesë të misionit të Kombeve të Bashkuara në Kosovë, Bozovic dhe pesë serbë të tjerë, Dushan Jovanovic, Radomir Kasalovic, Radovan Radic, Milovan Vlaskovic dhe Slobodan Vucinic, kërkohen nga Interpoli, për vrasjen e policit Enver Zymberi.
Bozovic nuk e ka mohuar faktin se ka organizuar serbët nëpër barrikada, por ka thënë se përballja me makinat e forcave speciale ROSU ka ndodhur ndryshe nga përshkrimet që janë paraqitur në opinion. Enver Zymberi, nga Dubovci i Vushtrrisë, është vrarë më 25 korrik në përballje me një grup serbësh të armatosur në veri, gjatë operacionit të forcave të rendit për të rimarrë kontrollin në vendkalimet kufitare me Serbinë.
|
