Juneau – Bregu perëndimor i Alaskës sot ka përjetuar një mot të lig që nuk mbahet mend tash e 40 vjet. Stuhia përfshiu më së shumti vendin bregdetar Nome, ku era e fuqishme arrinte shpejtësinë deri në 160 kilometra në orë.
Për shkak të "stuhisë së të gjitha stuhive”, si e quajtën meteorologët këtë mot të lig, autoritetet e shtetit të Alaskës u detyruan të evakuojnë personat nga shumë vendbanime bregdetare. Kjo për arsye se ekziston frika nga krijimi i valëve të mëdha detare, që do të arrijnë pas disa orësh. Tash për tash nuk ka raportime për të lënduar, por era e fuqishme ka shkulur kulmet e shtëpive dhe ka thyer trupa drunjsh, ndërkohë që është ndërprerë edhe furnizimi me energji elektrike.
Sipas agjencisë së lajmeve AFP, një stuhi e tillë e fuqishme e ka goditur Alaskën më 1974. Atëbotë valët që rrihnin qytetin Noma arrinin lartësinë e katër metrave.
